...BERHIBERNASI...

Ambo mitok maah bbanyok adik kakok seghemo..lamo sunggoh tok jengok blog ambo...nok kato dok "hibernate" dok jugok...mugo cuti skoloh ke lo nih... sibok dok melaye anok2 la hoo...nok begotu nok begonih..nok gi situ nok gi sinih...mace2..seribu kkagho...2/3 hari lepah ambo bowok demo tuh gi Selangor Ria...alohh jenih2 ekspo laa jugok...tengok nnate..ado kambing..ado kudo..arnab pong ado...makenae tuh tok soh ghoyak lah...ado mmenae jugok...hok berayun..hok mmusing..mmutar ligat...rumoh hhatu pong ado...teringak ambo zame budok2 dulu maso ekspo buak di kkapong ambo...Pasir Pekae..di tapok muzium hok pah ke lo nih tok jjadi muzium...hhmmm..

UJIMINDA SIKIK WEH...

1. Sapo budok (kanak2) hok mulo2 masuk/peluk Isle (Islam)?

2. Batu hok mulo2 Nabi Ibrohiim jijok/jirik maso buat Kaabah kito panggil ggapo?

3. Hubungae keluargo antaro Rasulullah s.a.w. dengae Sayyidina Ali bin Abi Talib r.a.?

4. Ggapo persamoae 4 bulae nih:a) Muharram b) Rejab c) Zulqaedah d) Zulhijjah

5. 5 x 10 = 50....acu tra "hurai" kae formula ilmu hisab nih...

Tra la dehh...

* Dicedok dr Trivia oleh Husna Hassan Solusi isu No.12

..GHAYO AJI...OGHE MENIKOH...JUPPO SAING LAMO...CUTI2 MALAYSIA...

Banyok sunggoh aktiviti baghu nih...sekaliarong seghemo...ghayo..oghe nikoh..juppo saing2 diploma..& ccuti dengae anok beghanok...hhmm...seronot jugok...

..GHAYO AJI DALE BOH WEH!!..

Esok ambo nok ttolok kelik ghayo aji kkapong ambo....tapi...kkapong ambo dok tengoh BOH...air sekak dado bunyi kaba..nok sembeleh lembu guano nih......insyaallah sedae molek ambo sapa..air surut bakali...pakat2 doa getek weii ko ambo....biar selamat kelik kkapong & selamat kelik semula ko Shah Alam...jange ssakut tengoh jale dale BOH..mitok Tuhe jjauh...!!

* lamo doh weii tok "MAIN" air boh & tok ngayuh perahu...

..NOK MUTOH WEH..

Sari duo ni ambo dok kalut nnando khetah perikso budok2...tok banyok dale seghatoh lebih jah....mace2 jenih tulisae...hok comey & sedap mato ngelih pong ado...hok udoh pong tok kurae...nok ceghito UDOH nyo tulisae budok2 nih...kalu ambo ambik pen tulih nga kaki...tulisae kaki ambo comey lagi....berat laa weh!!...hok tu ya nok MUTOH tuh...hhmm!!

..WANITA..

"..Wanita, makhluk ciptaan Allah s.w.t yang terselindung padanya khazanah kerahsiaan..Tanpa wanita, hidup seorang lelaki akan sunyi. Kejadian seorang wanita itu unik. Dialah penawar kalbu, penyejuk hati dan penyemarak obor semangat juang para mujahid..."(Dipetik dari Solusi Isu 11)



* mitok maah banyok lah..entry nih tok kecek Kelate..

...TERUSS MENANTI...

...Doh nok buak ghano...sejarah tidok berlaku...teruskae berjuae wahai Wira Merah...kami peminat akae terus menanti!!....walaupun Piala Idaman mungkin singgah di ISTANA SRI MENANTI!!